SERMON

KROSS THU

    

         Lal Isua leh Kraws chungchang hian Thlarau lam atang kher lo pawhin ngaihven a hlawh em em mai a. Khawvel mithiam, a bikin thilhlui haichhuak pawl (archaelogist)-ho pawhin Isua Kraws te, a thlan te, a thihdan chungchang leh a thawhleh dan chungchanga thil hriat leh khawvel hriata evidence pho chhuah theih an chak a, thudik tluantling chiah lo thlengin an thehdarh fo mai a. Hei vang hian thudik hriat pawh a har a. Tun laia video pakhat lar takah chuan Isua Kross awmna hlui hmuchhuakin an insawi a. An sawi dan chuan Isua Kraws awmna lai chu tlang pang atangin a khi tlang thla ruak mai a. Isua naka an chhunna thisen far chu lei hnuaiah put thlain Israelte Pathian Bawm, tuma hriat loha a ruka lei hnuaia lo inphumah chuan a far thla a, a thisen farna chu kil thum neiin triangle shape ang hian a la dum niin an sawi a ni.
    Midang pawhin Isua tuamna puan thisen kai chu an dahna Biak In atanga ru chhuakin a thisen sample chu an la a, Isua DNA an nei niin an insawi bawk a. Anmahni tawngkamah phei chuan “Pathian DNA kan nei ta,” ti hialin an sawi a ni. Thenkhat sawichhetute pawhin Isua leh Marthi chu nupa angin an sawi mek bawk a. Eng pawh nise tun tuma kan ngaihtuah atan chuan helam hi chu chhui thui hman loah inngai mai ila. Kan Pathian Thua chiang taka a lan danin Isua hi Jerusalem kulh pawnah Kalvari tlangah Golgotha ‘luruh hmun’ an tihah chuan midang pahnih nen Kross-ah an khengbet a ni.
    Kross hi khawvelah a lar hle mai a. Thawnthuah phei chuan Thlahrangte leh vampire te pawhin an hlau hle niin an lantir thin a ni. Kross chu thil kawkawlh sawina a ni mai a. Kan in bangah te khawlaiah te pawh thil kawkawlh chu kan hmu fo thin. Kross hrim hrim hi ngaihsanawm tak leh thil thianghlim, ramhuaite hlauh tur niin a lang lo. French Revolution laia mi lu tanna khawl (guillotine) ang mai khan he thing-kawkalh, mi tamtak tihhlumna hi a rapawm duh viau zawk awm e. Kalvari tlang pawh hi tlang mawi leh ngainatawm tak a nih a rinawm loh a. Misual an tihhlum thinna hmun a ni a, ‘Golgotha (Luruhhmun)’ an tihna chhan pawh hi thenkhat chuan a tlang hi luruh pian ang tak a ni thin an ti a. Thenkhat erawh chuan, mi tamtak tihhlumna hmun a nih vang a ni an ti bawk a. Eng pawh chu ni se, mi tamtak thlaphang mangang leh thi tur chalchang aurawl hriat fona hmun leh thisen luanna hmun, rapthlak taka mihring tihhlumna hmun a nih avang hian a hming sawi ringawt pawh hian dawihzep rilru chu a tim ur ur thinin ka han ring deuh a. Han zeldin thubawl ta zel ila, a hun lai hian he tlang hi “A hrang,” tia an thlahrang hmuh sawi tur hria pawh an awm nual ka ring!
    Kan hlaah te hian “Aw tlang mawi Kalvari” ti tein ngainatawm takin sawi mah ila, mihring rilru pangai atang chuan Golgotha leh Kross chu ngainatawm loh tak mai, tihbaiawm zet mai an ni zawk a ni. Nimahsela chu thil tihbaiawm tak mai chu hlaah “Kei ka tan chu kraws chu ngaihhlutawm ber a ni” tiin kan sa tlat si a; eng vang nge? A chhan chu keini misualte chhandamna tura tling zo awm chhun Pathian fapa thisenin a bual tlat a ni. Lal Isua taksa kan tana hlana a awmna hmun leh a thisen kan tana leihbuaka a awmna hmun, kan damna awmchhun Kraws hi ringtu tan chuan a ngainatawm a, luruh hmun pawh hmun mawi a lo chang thei ta zawk a ni.
    Kalvari tlangah chuan Kross pathum a ding a. A sira Kross pahnihte chuan kan tan awmzia an nei lem lo. Misual thihna an ni mai. A laia Kross ding erawh hi chu tling lo min titlingtu, thiam lo thiamchanna a ni a. Thing tha an hmang emaw an cheimawiin an nawt mam bik emaw a ni chuang lo. Nimahsela Pathian fapa, a taksa leh thisen hmanga nun nei lote hnena nunna pe theitu chuan hrehawmna, hmuhsitna leh na tinreng tuarin a nunna kan tan a hlan ta a. Pathian ni mahse mihring ang chiaha na hre mi, hrehawm tuar thei, hlauh leh zah pawh hre miah a insiam a, hreh chung chungin, hlau chung chungin, na ti chung chungin a ni kan tan tan a tuar ni.
    A vei apiangte chuan “Pathian fapa i nih chuan Kraws atang khan lo chhuk ta che,” an ti a. “Pathian a ring alawm amah hi tunah hian chhandam rawh se; Pathian fapa ka ni a ti si a,” an ti a. Misual thi tura hrem takngial pawhin, “Krista chu i ni lovem ni? Intidam la keini pawh min tidam ta che,” tiin a au el a. A thiltihtheihna te, a Pathianna te, Krista chhandamtu a nihna hmang tein amah an fiahin an thlem a, hei mawlh hi tuar a har ka ring thin. Setana pawhin “Pathian fapa i nih chuan,  heng lungte hi chhanga chan thu pe rawh; Pathian fapa i nih chuan tla thla la... i chungthuah zawng ...” ti tein Pathian fapa a nihna hmangin fiah leh thlem a lo tum tawh a nih kha. Mihringah chuan kan nih reng leh kan dik rengna lai taka dawta min puhna leh min chona, min fiahna hi thlemna tuar har lai tak a ni fo thin reng a. Hneh loh turte ai chuan ngam zawng takte min tihna pawh thin a ur hma thin. Lal Isua tan hian angel sang tam tak koh thlak a, a kilhna thirkhente chu mitkhap kar leka phawi a, Pathian fapa a nihzia lantir tur leh dawta an hekna zozaiah te a dikna lantir tura Kraws atanga chhuk hi a har reng reng lo. Mahse theih loh chhan pakhat a nei; a kilhna thirkhen chauh khan Lal Isua kha a khengbet lo, misual chatuana boralna meipuia lut tur nang leh kei min hmangaihna chauh chuan a kilhna phawi tur leh Kross atanga chhuk thei lovin a khengbet a ni zawk.
    Mi thenkhat chuan, “Pathian hmangaihna hi kan sawi tam lutuk a...” an ti fo thin, a dikna lai a awm ang. Nimahsela Pathian hmangaihna hi sawi zawh theih a ni lova, chatuan pawhin a chanve pawh kan sawi seng dawn lo. Pathian min hmangaihna chu a takin Kraws-ah chuan a lo lang ta a, chu hmangaihna thinlunga hretu chuan hmangaihna vekin an chhanglet lo thei lova, mite hmuhsit Kraws chu an lo thlang ta thin a ni.

ARTICLE

        SOUND SYSTEM LEH A KAIHHNAWIH

         Puipunna hmun reng rengah hian sound system hian hmun pawimawh taka luah lo thei ta lo. Inkhawmna a ni emaw, fellowship a ni emaw, khawtlang punkhawmnaah emaw pawh ni se sound system a that loh chuan programme a hlung tak tak thei lo. Thusawi ngaihthlak a ngaih hunah te, zai ngaihthlak a hunah te, rimawi kan mamawh hunah te hian hmun lian tham leh mipui tam tham punkhawmnaah chuan mihring aw leh ri tha taka kan hriat theih a ngai a ni.
        Mihring bengin ri a hriat theih chin sang ber leh hniam ber inkar hi 20hz - 20khz a ni a. Chutiang ri pe chhuak thei tur tawngrinna (microphone) te, speaker te leh amplifier te kan mamawh a. Kan hmanraw hman azirin ri sang ber leh hniam ber kan mamawh loh chang a awm thei bawk. Thu kan sawi hian kan aw ki hniam ber leh sang ber kan hmang kher lova, mi naranin chutiang aw kan chhuah thei vek kher bawk lo. Hmanraw tha, ri hniam leh sang dik tak leh mawi taka pe chhuak thei leh tlo si te chu to tak tak an ni tlangpui a, tun laiah phei chuan in zau tak chhunga mipui pungkhawmin a rin zawng inang veka an hriat theih tura hmanraw duan te pawh a awmin a tha tulh tulh a. Kan ram Biak In vela kan hman ve phak tlanglawn te hi chu hmanraw veivak (portable) leh chanvo neituin ama aw a hriat vena tur (stage monitor) atana duan an ni tlangpui.
        Ram changkangah chuan Biak In, Hall leh puipunna reng reng hi eng, boruak thianghlim leh ri leh hmanraw hrang hrang awm dan tur ngaihtuah saa mithiamin an duan a ni tlangpui a. Kan ramah chuan a rem dan danin kan phuahchawp nawk nawk a la ni ber a, kan hmanrua pawh duhthu a sam lo va, kan phak tawkah hian tha thei ang bera hman kan zir a la tul rih a ni. Kan Biak Ina kan hmanraw neih thenkhat vantlang tana hman tangkai dan lo thlir ila:
1) Microphone    :  Tawngrinna hi chi hrang hrang a awm a. Biak Ina thusawina atana kan hman ho leh tie clip te hi condenser (cardioid) an ni tlangpui. Condenser hi studio-a ri dang awm lohna hmuna hla tak atanga kan ri duh man pha tur microphone chak bika duan an ni. Hnaih lutuk chuan ri pup pup a siam thei a, a chak em avangin ri hrang hrang a man hma bik a a kiu awl thin. Hman thiam chuan tangkai tak, hman thiam loh chuan buaithlak tak a ni thei. Dim an ngai bik a, pen ringawt paw’n a chhe hlauh thei. Test dawn chuan tawng chhin mai a tha ber.
         Zaina leh zaihruaina atan hian dynamic microphone kan hmang ber a, hnaih deuha hman tur, ri dang man tel lo thei ang ber tura manna lai bik nei (unidirectional) a duan an ni. Tihpalh pawh a dawl deuh.
2) Speaker    :  Speaker hi amplifier nena neih kawp ngai, power pek chawp ngai chi (passive) leh powered (active an ti bawk) a awm a. Chi hrang a tam khawp a, kan neih phak tlangpui hi multipurpose ‘Ren tin daih’ tih ang deuha duan an ni a. Bi-amplified an ni ber a, a hnuaia speaker lian ri thum (Low frequency) chhuahna tur leh a chunga ri sang (High Frequency) chhuahna tur dah an ni. Ri hniam tak thleng pe chhuak thei chu a lian bik tlangpui a, 15 leh 18 inches hi a tlanglawn an ni. A coil pawh a bik taka duan an ni. Kan sawi thui hman lova, a zuartute sawi ringawt ni lova, Watt rating an pek dan te, Frequency range te, SPL te amplifier class thlengin a dik tak zir chian a pawimawh. Company hrang hrang siam a inang lo a, a man pawh a insan hleih hle. Dim an ngai a, hman thiam tawk loh vang te, Biak In mamawh tawka chak leh tam kan neih zawh loh avanga a load lak theih ai sangin kan hman vang tein kan tihchhiat phah fo.
3) Rimawi hmanrua te    : Khuang, keyboard, guitar, bass guitar, drumset te kan hmang lar a. Khuang leh drumset hi a volume duh ang tawka pe chhuak tur chuan a rikna hmun tur a bika duan emaw, electronic hmanrua hman emaw a ngai. Khuang pawh hi electronic kan la hmang thuaiin a rinawm. Rik dan tur leh hunbi fel tak an nei a, hman thiam chuan zai tinuamtu leh inkhawm boruak pawh vawrh kang dawrh thei an ni. Hman thiam loh erawh chuan bengchheng an tling thuai thin.
        Tun laiah mi tamtakin sound system tha tawk lo kan buaipui a. Nimahsela kan neih zawh tawk erawh kan ngaihtuah tel a tha awm e. Zai mi pakhat chuan Biak In pakhatah a zai chu tihkhawk a duh a, chutiang hmanrua an lo nei si lo a, a ang zui hrep mai! Thusawitu pakhat pawhin a duh tawka a rin loh avangin Mizorama sound operator tha ber pawla an sawi thin chu “I va thiam lo ve” tiin a hau hrep mai a nih chu! Hmanraw enkawltu chu a rilru a fim a pawimawh a. Hmanruaah hian kan hmanraw neihin a tlin tawk enna (meter) a awm a, kan duh aia a zawi a, min sawisel luai luai a nih pawhin pelh loh hram tur a ni. Kan hmanraw tlin baka chet leh thiam chiang mang lova ba-sa-ngam hi chhiatna hmawr a ni a, kan neihchhun pawh tihchhiat ai chuan “Kan hmanraw tlin tawk a ni,” tia sawiselna karah pawh fimkhur thiam a pawimawh.
        Sound system chungchang hi sawi tur a tam a, a then pawh kan sawi seng rih lo a ni. Lehkhabu hrang hrang leh internet-ah pawh zir tur leh chhiar tur a tam em em tawh a, a tel lova kan khawsak theih loh avang hian zai mi leh thusawi mi tan phei chuan tlem azawng chu hriat ve hrim hrim a tha khawp mai. Thiam chiang mang lo leh hmanraw zuartute thuziak dik tawk lo pawh a tam avangin fimkhur erawh a ngai thung.

Sermon

 KRISTIAN CHHUNGKUA

-Rbt Lalthanvawra

Nunna chi neiin pumkhatah a siam lovem ni? Chi thlah Pathian ngaihsak a zawng a ni. (Malakia 2:15)
    Kristian chhungkua tih thu hi thu pawimawh leh sawi hlawh tak a nih mek laiin a taka hman leh nun chhuahpui tur hian ngun taka ngaihtuah leh zir chian ngai tak a ni tih chu kan hre theuh awm e. Tun tumah pawh hian Kristian chhungkua din a tulna leh a pawimawhna te kan tarlang thiam tawk dawn hauh lo a ni tih inhre chungin Kristian chhungkua kan din theihna tura min tanpuitu a nih beisei chungin phak ang tawk tawkin Kristian chhungkaw din a pawimawhna leh a tulna te tarlan kan tum dawn a ni.
    Aw le, tun chawlhkar liam taa Kristian chhungkaw chawlhkar hun kan hman naah khan Pathian thu ka rilrua awm reng a awm a, chu chu Nunna chi nei in pumkhatah a siam lovem ni? Chi thlah Pathian ngaihsak a zawng a ni. (Malakia 2:15) tih hi a ni a. He thu kan en hian chhungkaw tin mai min dintu, a nihna leh kan nundan tur leh kan khawsakhonaah hian a duhdan leh a bul tumtu a nihna chiang takin a rawn tarlang a ni.
    Tun lai khawvela sualna chi hrang hrang lo pung zel hian chhung tinte min luhkhung mek zel a, chutih rualin khawvelin hmasawnna atana thil tangkai tak tak a hmuhchhuah, a lova kan awm theih tawh loh thleng hian sualin hmanruaah a hmang ta zel a ni a, chu chuan kan hriat loh hlan te, kan hriat reng chung pawhin chhungkaw member tinte, a lian ber atanga a te ber thlengin rilru leh taksa kan ngaihtuahna leh kan tawngkam thlengin sual lama min hnuhluh nan a hmang zel a. He sual tuifawn lak atang hian khawvel thiamna leh finna, Politics te hian min chhanchhuak theih dawn si lo. Chuvangin heng sualna laka  min veng tur hian a pawimawh ber chu Pathian duhzawng leh a zirtirna te ngai pawimawh a, Kristian chhungkua kan din hi a ni.
    Kristian chhungkua kan dinna tur atana chhungkaw entawn tlak tak tak kan Bible-ah hian an awm teuh a. Chung zingah chuan Kristian lo din tirh laia Kristian chhungkua pathum te hi an chanchin i han chhui teh ang.
    1. Mari (Marka Nu) : Barnaba farnu emaw a ni awm e. (Kol  4: 10) Jerusalem-ah in a nei a, Kristian hmasate’n inkhawm nan an hmang thin a ni.  A fapa Marka chu Chanchin Tha pahnihna ziaktua ngaih a ni. Tin, Petera lungina a tan lai khan thahnemngai takin a chhuah theihna turin an inah an tawngtai a, Lapa Vantirkoh chuan Tanin atanga hruaichhuakin Marka nu inah a hruai lut a ni tih kan hre bawk a ni. Hemite chhungkua hi Pathian an rinna leh a hnung an zuinaah hian entawntlak an va ni em! Ringtute thlamuang takin an inah hian an hahchawlin Lalpa chu fakin chibai an bukho thin a, Pathian thiltihtheihna leh malsawmna tamtak thlarauah an dawng a ni.
    2. Ludi : Ani hi Ludia bial Thuahtira ami puan senduk zuara Philipi khuaa awm ani a, Pathian be mi a ni (Tim 16:14) Paula thusawi a ngaihthlak hnuah amah leh a chhungte’n Baptisma an chang ta a, a inah hian Paula leh Sila te a mikhual a, Chanchin Tha hrilna kawngah an thawhhlawk em em a ni.
    3. Lazara te chhungkua : Ani hi Mari leh Marthi te nuta pa a ni a, a farnu te nen chuan Bethani-ah an awm a. Jerusalem atanga mel 2 leka awm a ni. Isua chu khawpui a tlawh dawnin an inah a thleng a, vawikhat chu Isua awm loh hlanin Lazara chu a damlo a, a thi ta mai a. Isua chu ni li lai chinah a lo kal a, Lazara, puk thlana a awm tawh chu a kaitho leh ta a. Joh 11: 1-15 kan chhiar chuan hemite chhungkaw chanchin atang hian Pathian hmangiahnain chhungkua a phuarkhawm thlamuanthlakzia leh Pathian ropuina thihna hnehtu a ni tih nasa taka tarlanin a awm a ni.
    Aw le, Kristian chhungkaw duhawm tak tak pathum chauh kan tarlan atang hian Kristian chhungkua chu Isua’n thuneihna leh Lalna a chan thinna chhungkuate an ni tih kan hmu thei a. Vawiinah hian kan chhungkaw member tin te la piangthar vek lo mah ila, Isua’n Lalna leh thuneihna a chan theihna turin Kristian chhungkua din theuh i tum ang u. Kristian chhungkua kan dinna tur atan hian member tinin mawhphurna kan nei theuh a, nu leh pa an pawimawh ang bawkin fate pawh an pawimawh bawk a ni.
    A tawp berah chuan kan Lal  Isua a lo kal leh thuai dawn avangin Lal Isua ringtu kan nihna hi he khawvel atan mai ni lovin, he khawvel piah lam atan pawh a ni. Tun lai hun inthlak danglam dan leh khawvel  thil hrang hrang te kan thlir hian Lal Isua lo kal lehna hi a hnai tial tial a ni tih min hrilh nawn mawlh mawlh a ni. Kristian chhungkua hian a tum ber chu khawvela chhungkaw hlim leh nuam tak din mai ni lovin Lal Isua lo kal leh hunah hian kan chhungkaw member tinte Pathian rama hruai thlen hi a ni.
    “Lo cheng ve la, kan run chhungah
    Hmangaihtu Lal Pathian
    Chhungkaw puipa ber lo ni la,
    Kan in, kan thinlungah” tiin Pathian hnenah inhlan ila, Kristian chhungkaw tha tak kan din theuh theihna turin chhungkaw tin te’n tan i la theuh ang u.

ARTICLE

   ELECTRIC PASTOR BIAL ZAIKUTPUI THLIRLETNA

           Electric Pastor Bial Zaikutpui 2011 chu a lo tiak leh ta reng mai. Kum dang zaikutpuiah chuan Bial chhung Kohhran tin puala zaipawl intihsiakna a tel zel a, kumin chu “Change” kan ti ve a ni ang, Music Camp kan ruahman zawk a, nimahsela inpe thei kan tam loh avangin kan hlawhchham ta rih a ni. Inkhawmpui dang ang lo takin thupui kan nei lo tlat mai a, a dangdai ve hrim hrim. ‘Zaikutpui’ han tih chuan mi tinin hawi lam kan nei sa thova, thupui hran neih kher loh pawh a lo tihchi phian mai!
LAWMNA TUR:
1. Inbuatsaihna : Bial Music Committee hruaitute’n ngaihtuahna, tha leh zung an sen nasat turzia chu a hriatthiam vek mai. Music camp te hlei hlei kha hlawhtling thei se chuan kan chhawr tangkai em em tur thil a ni. A thlengtu BCM Gosen pawhin theihtawp an chhuah a, sound system pawh nuai khat leh singhnih man vel an lei belh hial a ni! Ushering a tha thlawt a, thil theihnghilh thlengin min pe zui chat chat mai a, kan thiannu lehkha sem tur thlauh palh pawh an lo chhar a, a dawngtu turte hnenah an lo sem diam mai! Refreshment buatsaih leh sem dan pawh a felfai thlap mai.
2. Zaipawl  : Good Friday hunpui zawh chiah ni mahse Kohhran zaipawl tin leh Bial zaipawl ten inkhawm apiangin hla tha takin an rem thei a, BCM Gosen Biak In hi zai nuam tawk vel chiaha lian a ni a, Biak In chawm zo tawk vel chiah sound system nen, a zai hnuhnung apiang a mawi zual emaw tih mai tur an ni. A tawp zan hian Electic Veng Kohhran Jr. TKP te mawi takin an zai bawk. Zaipawl zaiah hian hmel leh chezia thlengin hmasawnna tam tak a hmuh theih a, a lawmawm hle.
3. Mipui Zai :    Mizo Kristian inkhawm hlawhtlinna pawimawh tak pakhat chu mipui zai kan tui em tih leh kan lam nasa em tih hi a ni awm e. Tun tum zaikutpui hi khua a lum deuh nen, tum dang inkhawmpui ang chuan kan lam hut hut lo deuhin a lang a. Nimahsela thalai kan tam bawk a, aw chi kima, “Khumtir rawh u Angel te u..” kan han ti tuar tuar mai kha chu nuam tak a ni!
4. Phek thlirna : Programme duan a felfai thawkhat a, sermon a hlawkthlak thin hle. Soloist pawh kan Bial hian kan lo nei tha hle mai. Tul lutuk lem lo puan vak vak kan sim ta viau. Inkhawm laia phone ri ruai ruai a awm miah loin ka hria, mipui pawh kan changkang sawt e. Zai tha duh mang lo hmuh tur an khat pharh mai. Inkhawm laia chhuak pawh an tlem a, ngaihthlak hun laia phun sur sur leh muthlu lup lup a zai huna lam leh mai ang chi pawh kan awm ta loin a lang. Zai tur hritlan thu sawi hmasa kher chi leh zaipawl mipui hmaa khuh tluar tluar ching pawh an awm ta lo.
HMASAWNNA TUR:
1. Hun hman dan: Hun hman dik hi tan hun vawn dik chauh a ni lo. Tul lutuk lo sawi kual chiam te, inbuatsaih that loh avanga thu ngai sawi nawn vak mai leh “Eh...ih.. ah” kan tih chhung leh kan chet ran thiam loh vanga kan hun khawhral hi a uiawm tham thin a ni. Hnam changkangte inkhawm pawimawh bikah te chuan programme chhiar chhuah te, “I lo kovang u” tih leh chanvo tih zawha comment kual duah hi a tam tawh vak lova, chibai bukna, Pathian thu chhiar, zaipawl, solo, sermon, mipui zai, tawngtai etc., programme duan dan fel tak hmangin an hun theuhah chanvo neitute an indawt thlap mai a, programme kan ngah tum phei hi chuan entawn thiam a chakawm thin.
2. Programme    : Programme a tha viau a, lehpekah chuan variety tam ta se ngaiah kan nei lo deuh theiin a rinawm. Zaipawl style inang vek tam lutuk ai chuan duet, group, beat group leh accapella thlengin music genre pawh chi hrang tam deuh leh mipui zai tam zawk awm thei turin inbuatsaihna hun thawl zawk nen tan la ila, zaikutpui a nih ang ngeiin speaker tih hluai aiah Praise & Worship tihte awm ta se a inhmeh viau maithei.
3. Mipui kan tlem: Bial zaikutpui hi zaipawl meet emaw ti tlat kan la tam viau. Bial chhunga Kohhran mi zawng zawng huap programme-ah chuan beisei aiin mi kan tlem tlat thin. Zaikutpui a nih ang ngeiin mipui zai tam se la kan vaiin kan ta neih lehzual thei ang em?
4. Music camp kha : Thil tha tak tur kan puitlin zo lova, a uiawm em avangin “ta sela,” tih tur a tam khawp mai. Hun rei lo deuh zawk, zan riak a nih pawhin ni tin hna thawh dal lo turin 8AM - 5PM tal awl ta ila lut thei kan tam zawk ang em? Kan camp thulh boruak vel khan zaikutpui boruak thleng khan a delh rit deuh em aw tih theih a ni awm e.