H.Lalroluahpuia
“Tihdam i duh em?” He thu hi Lal Isua’n damlo pakhat, kum sawmthum leh kum riata rei lo na tawh, Bethesda dil kianga damna duha lo mu hnena a zawhna a ni. He zawhna atanga lang chiang tak pakhat chu, Pathian hian mihringtea ‘Duhthlanna’ a dah hi a ngaipawimawhin, a zahsak hle a ni, tih hi a ni awm e. Amah vekin, “I thuin thiam i chang anga, I thu vekin thiam loh a chantir ang che” a ti a ni. Hetihlai mek hian kan duhthlanna erawh min hauhsakin, A tana hlan turin min sawm reng a , kan duhthlanna sang ber min ngen a ni. Tin, he thu zawhna hian a tarlan chian em em chu, he zawhna zawttu Lal Isua Krista, tidamtu a nihzia hi a ni. He zawhna zawttu hian damna duh a, Amah pantu apiangte hnenah tisa leh thlarauvah damna famkim a pe thin a. Chutiangin, Bethesda dil kianga damlo pawh hian Tidamtu a hmuh veleh a remchan angin dam a duh thu, vui aw takin Isua hnenah a thlen a, Tidamtu Isua’n a tihdam tak zia kan hria a ni. Tidamtu, Lal Isua Krista a ni miau va!
He khawvela rei lote a cham chhunga, Lal Isua hna thawh langsar ber chu, ‘Tihdam rawngbawl hna’ a ni. Damlo te, zeng te tidam a, mitdelte mit tivar a, kebaite kea kaltir a, pharte tithianghlim a, mitthite kaitho a, ramhuai zawlte ngaiawh leh tirtu a ni a, nun nei lote tan chatuan nunna hlu ber thlengin a buatsaih a ni. Eng angin nge Lal Isua Krista hi i tan i hman tangkai ve dawn le? Eng angin nge Tidamtu Isua Krista hi i tih dawn? “Tu pawh ka hnena lo kal chu ka hnawtchhuak tawp lovang” tiin, Lal Isua’n min sawm a, min nghak reng a ni.
“Kei Lalpa, tidamtu che ka ni” titu hian tun thlengin mi tin tana tisa leh thlarauva damna famkim, kan tan a la dah reng a. Mihringte tana tih rual ni lo pawh, Pathian tan chuan tih rual loh a awm lo va, Pathian nen chuan engkim tih theih a ni. Keini Kristian, Lal Isua neitu inti te zingah pawh hian midangte hriatpui lem lohva natna phur hi kan tam awm e. Kan natna chu eng ang pawh nise, Tidamtu Lal Isua hnenah thlen ila, kan duh takzet a nih phawt chuan damna chu kan chang ngei ang…
Ringtute hian Vanram kan panna kawngah hian ni tin a thara keimahni nun, ‘Hossana’ (Tunah chhandam rawh) kan pekna tur hi a tam thin hle. He khawvel hi kan khualzinna mai, ringtute famkimna hmun a la nih loh avangin keimahni theuh hi engtik lai pawhin kan insiam tharin, sual thihsanna nun nen , Pathian hnenah kan inhlan thar mawlh mawlh reng tur a ni a, chumi ti tur chuan Lal Isua hnenah kan kal thin tur a ni..
Kan theihna chin chinah, kan phak leh kan hriat ang tawk zelin rawng kan bawl a, kan hmanhlel hle thin. Kohhran leh pawl, mimal angte pawhin hma kan la nasa hle a. Hetia kan kal mek lai hian, Lal Isua leh A lawmna ber thlarau bo chhandam leh A hna tul ber Chanchintha hrilhte hi keimahniah an lal ber reng em tih hi kan in zawh fo reng a tul a ni. A thupek anga, Amaha awm reng a, A hnung zuitute kan nih takzet chuan, Chanchin Tha hril a, thlarau bo chhandam hi kan hna tul ber a ni tur a ni. Chu nun chu kan hlamchhiah leh keimahni lam inrelfel kan tum lutuk thinna avang tein keimahni ngei natna kan insiam a, kan rawngbawl-puite nena kan inkarah lah hliam mihringte tana tihdam rual loh kan siam fo thin. Chu chuan, kan rawngbawl-naah nasa takin nghawng a nei a. Krista thuhretu, thahnemngai taka a rawngbawltu inti siin, Krista hmel hliahtu kan nih phah fo thin a ni.
Sipai za hotu phar, Namaana khan damna a chan khan thuawihna mai ni lovin, mihringa tlawmna namen lo tak a paltlang a ni. Lal Isua zuitute kan nih angin Lal Isua hnen pan tur hian lian leh ropui a awm theih lohva, hmangaihna avanga a chhandam tawhte kan nih avang pawhin A hnen pan tura tlak lo a awm theih bawk hek loh. Natna phuarin i awm em? I taksa a dam em? I rilru a dam em? I thlarau a dam em? Tihdam i duh em? Tidamtu Lal Isua Krista, i nih angin pan rawh. Mihringa tlawm a tul a nih pawhin hreh suh. Damna famkim a pe dawn che a ni! Lal Isua Krista hi kan zavaia tan damna kim a ni e! A hnenah chuan taksa, rilru leh thlarau, damna famkim a awm si a!!!“ Tidamtu Lal Isua Krista …Amen! “
No comments:
Post a Comment