Feb 13, 2011 Article

BCM ASSEMBLY 2011

    BCM Biak In Rahsivengah BCM Assembly vawi 115-na chu nilai zan khan tan a ni ta a, thupui ‘Isua Krista lo kal lehna’ tih a ni.
    Ninga Dar 9 atang khan rorel tan a ni a, thurel tur tlangpuite chu: (1) Planning Commission report, (2) Constitution leh rules eng emawzat tihdang-lam tura rawtna awmte (3) ABC atanga thu lut 23 te (4) Thu bengverh zualte (5) Zawlaidi chungchang (6) Bial ni pawimawh tih tlem (7) Home Mission-a Missionary te Furlough-a tirh ve (8) Pastor Quarter sakna tihpun rawtna te chu a langsar zual a ni.
    President thar Rev.Dr.K.Thanzauva, President Elect chuan Rorel a kaihruai a, President Elect atan Rev.Dr.Raltawnga thlan a ni.
    Ninga Rorelna chuan Pastoral Department atanga thu lut, Pastor Bial pathum then a, Bial thar pathum siam belh a rawtna chu rem a ti a. Hetiang hi Bial then dan leh Bial thar turte an ni.
1) ZOTLANG BIAL (Lunglei) chu - Zotlang Bial leh Serkawn Bial-ah thenin, Zotlang Bialah - Zotlang, Zotlang North, Pukpui leh Kawmzawl te an awm ang a, member2728 an awm ang. Serkawn Bialah hian- Serkawn, Ramzotlang, Zohnuai leh Khawiva te an awm ang a, member 3426 an awm ang.
2) HAULAWNG BIAL chu - Haulawng Bial leh MUALTHUAM ‘N’ Bial-ah then a ni ang a, Haulawng Bialah hian - Lalveng, Lamthuamthum, Bethel, Mausen, Chengpui, Hnahchang(Zotui), Hmuntlang leh New Haulawng te an awm ang a, Member 1826 an awm ang. Mualthuam ‘N’ Bialah hian - Mualthuam ‘N’, Hermon leh Sekhum te an awm ang a, Member 961 an awm ang.
3) PHAWNGPUI ‘N’ Bial chu - Phawngpui North bial leh PHAWNGPUI WEST Bial-ah then a ni ang. Phawngpui N Bialah hian - Sangau, Horeb, Pangkhua, Sentetfiang, Thaltlang leh Cheural te an awm ang a, Member 1360 an awm ang. Phawngpui West Bialah chuan - Lungtian, Rawlbuk, Vatek leh Tuipui ‘D’ te an awm ang a, Member 882 an awm ang.
    Chanchin buatsaih lai hian Palai in-report zat hi an vaiin mi 954 vel an ni tawh. Tunah hian ABC (Area Baptist Council) 13 an awm a, Pastor Bial - 72 (hawn thar te nen) awmin, Tualchhung Kohhran 530 ah chhungkua 29673 an awm. Ordain Minister thawk lai 119 leh Pastor Pensioner 27 an awm bawk. Probationary Pastor 24 an awm mek a, heng zinga 6 te hi tun Assembly tukin inkhawm hian Ordain tur an ni.
    Kohhran Upa 2338 an awm a, chung zinga 14 chu hmeichhia an ni. Rawngbawltu 3420 an awm a, chung zinga 64 te chu Hmeichhia an ni. Member zawng zawng - 146331 niin Mipa - 73390, Hmeichhia - 72941 an ni a. Baptisma chang member 98,508 niin Mipa-49140 Hmeichhia-49368 an ni. Kum 2010 Assembly leh kumin Assembly inakrah mi 3507-Baptisma chang thar an awm a, Sakhaw dang atanga lo lut mi 526(Mission Field chhiar tel lovin) an awm bawk. Kohhran Pawl dang atanga lo lut-2744 an awm laiin Kohhran Pawl danga chhuak member 934 an awm. Nupa tuak thar 821-ah Danpuitlinga Innei tuak 354 an awm a, Dante-a Innei tuak 467 an awm bawk.
    Thalai Kristian Pawl(TKP) Member 29532 niin Mipa -14802, Hmeichhia 14730 an ni a, Baptist Kohhran Hmeichhe Pawl (BKHP) member 26800 niin Baptist Mipa Pawl(BMP) member 13634 an ni. Kristian Naupang Pawl(KNP) member 29532 awmin, Mipa 14802 leh Hmeichhia 14730 an awm bawk.
    Tunah hian BCM hnuaiah hetiang hi thawktu dinhmun a ni:- Central Department hnuaiah - 173; Service Department Hnuaiah - 296; Mission Department hnuaiah - 393; TOTAL - 860
    2010 January - December chhunga BCM Mission Field hrang hrang Ramchhung leh Rampawnah ringthar Baptisma chang zat chu 3497 an ni. Hemi chhung hian kohhran thar 32 leh Fellowship thar 16 din a ni bawk.

March 20, 2011 issue (Chhunzawmna)
    BCM Assembly neih zawh takah khan Pathianni hmasaa kan tarlan bakah kan hriathman tak loh thu pawimawh tak tak an rel a. Chung zinga pawimawh zualte chu:
A. 1) Zawlaidi chungchang : Zawlaidi chungchangah BCM in ngaihdan nei rawh se tih chu Zawlaidi hi alcohol content 14% lai a nih avangin zu a ni a, inthiarfihlimsan tura Kohhran mite inzirtir nise tih a ni.
2) MISSIONARY NUPUI/PASALTE MISSIONARY A PAWM CHUNGCHANG: BCM hnuaia Missionary thawkte nupui/pasal sorkar hnathawk lote missionary-a pawm chungchang thu pawm a ni a, hlawh hranpa pe lovin TA/DA pek ve nise tih a ni.
B. Planning Commission rawtna phek 173-a chhah chu a tlangpuia pawm a ni a BCM kalphung eng emaw chen a tidanglam dawn a ni.
1. BAPTIST LITERATURE & PRINTING PRESS : BCM inrelbawlnaa Department hrang hrang 17 zingah Church Relation Committee chu tihbo a ni a; Baptist Literature Service leh Baptist Printing Press chu Department pakhata kaikawpin Baptist Literature & Printing Press (BLPP) tih a ni tawh ang a, General Manager in a ho ang.
    Aizawl West Bial atanga thulut Aizawla Printing Press neih tih chu tih rih loh ni se tih a ni a, Colour Offset thar lei tih pawh hmalak mekna a nih avangin sawi ngai lova ngaih a ni.
2. WORSHIP & MUSIC COMMITTEE : Tuna Communication Depart-ment hnuaia Sub-Committee ang leka kalpui Music Committee chu Worship lam nen kaikawpin Department puitlingah siam a ni a; a hmingah Worship & Music Committee tih a ni ang a; Director-in a ho ang.
3. SOCIAL CONCERN DEPART-MENT: Khawtlang nun sual tha lo hrang hrang leh tun lai thalaite harsatna hrang hrang sukiang turin Social Concern Department pawh siam thar a ni a; Director in a ho ang.
4. FOD pali zinga pakhat- Baptist Mipa Pawl (BMP) chu Bial huap thlenga an din remtih a ni.
5. FOD HRUAITU TERM : MTKP leh MBKHP hruaitute term chu kum 3 zel a ni tawh ang.
6. MINISTER/PASTOR ORDAIN THEIH: Pastor ni lo, Kohhrana thawkte an thiamna leh an degree neih azira Minister-a ordain theih dan tur kawng hawn a ni.
7. THAWKTU PENSION KUM 62-AH: Kohhran hnuaia thawktu nghet, Pastor/Minister ni lo te chu kum 62 an nih thlengin service hun pawhsei a ni a. Kum 62 hi pension nan bithliah a ni tawh ang.
8. MISSION & COMMITTEE: Mission & Evangelism Committee kan tih thin hi Mission Committee ti-a thlak a ni a. Ramchhung Mission Director hran awm tawh lovin Mission Coordinator a ni tawh ang a; chu chuan Rampawn thlengin a huam tawh ang. Ramchhung Mission Committee leh Rampawn Mission Committee a hranga awm tawh lovin Mission Board Committee tiin khaikhawm a ni ang a; a tul ang zelin AGS, Mission Coordinator leh Mission Promoter te an thawkho ang.
    Commission report pawm tak hian Constitution leh Rules 80 chuang a khawih avangin tihdanglam nghal a ni a. Palaite chuan a hman tan hun atan March 11, 2011 (Zirtawpni) chu an ruat nghal.