SUNDAY ARTICLE

       Innghahna muanawm

 (Johana 14:27)

                                                                                                                               -Rbt. Laltlawmlova Sailo

Khawvel pumpui hi a ralmuang lova. Khawvel Sawrkar inzawmkhawm UNO pawh hian remna leh muanna khawvelah a awm theih nan thil tam tak an sawiho in an rel a, nimahsela chu chuan vawiin thleng hian muanna tak tak a thlen lo.Nuclear ralthuam a pung zel a, tihtawp tumin Sawrkar liante an hmanhlelh hle a, mahse indona hial a hringchhuak zawmah a ni.
        Mihring nun hrim hrim mai hian thlamuang taka innghahna tur hi a lo mamawh em em mai hi a lo a ni a. Engtik lai khan nge mihringah hlauhna a lo luh ti ta ila, Eden huana kan thlatute’n Pathian an phatsan chiah khan a lo ni a. Pathian an hlauva an biru tan ta a nih kha. Eden bawhchhiatna khan hring fate chu thihna bawihah min lo siam ta reng mai a. Bible chuan Pathian lakah mi hrang, thi, kan ni tih min hrilh ta a ni. A rapthlak hle mai!
        Nimahsela Pathianin khawvel a hmangaih em em a, chutichuan a fapa mal neihchhun a pe a. Amah chu tupawh a ring apiangin Amah avanga chatuan nunna an neih nan (John 3:16) tiin van khua leh tui, Pathian fa nihna min rawn pe leh ta hlau mai. A va ropui em..! Pathian chu fakin awm rawh se. Fapa Isua Krista thihna leh thawhlehna ropui tak avang chuan khawvel zawng zawng tlanna min rawn pe leh ta a. A ring apiang tan chatuan nunna a lo ni tih Bible chuan min hrilh a ni. Vawiinah hian vanram chang zo lo, chang tlak lova inngai kan awm em aw? Mahni inbih a, mahni thinlung inenfiah chuan, tumah vanram chang tlak a inngai kan awm thei lova, thil nihdan dik tak pawh a ni.
        Mahse Sanglianthanga hla-ah chuan, ‘Keima lam kan han inen hian Lalpa, Engmah reng hi hmuh tur a awm si lo; Mahse Krista lam chauhka thlir leh chuan, Mi fel famkimah min lo pawm leh si.’ Hremhmun leh Vanram kar thu-ah emaw thlarau chhandam leh damloh thu-ah emaw Kohhran tihdan phungah te nen lam hian khawiahmah immghahna tur thlamuanna a awm lo.. Isua Krista’n thihna hneha tholeh a, a thlawn a chhandamna min pekah lo hi chuan. Krista hna thawh zawh tawh sa a innghah hi a thlamuanawm ber, “ Thlamuang takin awm rawh u, Keiin khawvel ka ngam ta”  kan Lal Isua’n min a ni. Isua Krista leh a hna thawh zawh tawh sa-a innghatte chu, ‘hlauva awm leh turin bawih nihna thlarau inhmu a ni silova, fa nihna thlarau inhmu a ni zawk’ (Rom 8:15) a ti a ni.
        Tin, Isua Krista neitu, van khua leh tui nihna chang tawh tu kan nih tawh hnu pawh hian; chang rih lo te pawh, khawvelah hian innghahna tur hi kan va han zawng nasa em ti rawh u. Mi thenkhatte chu nu leh pa-ah te innghatin thlamuang takin kan lo awm a, chutiang bawk chuan kan fanu kan fapa-ah te pawh. Nimahsela natna leh thihnain a khawih chhiat phak an nih ve avangin zankhat thil lekah kan innghahnate chu an ral leh mai thin a ni. Tin, in leh lo tha tak neiin, sum leh pai tam tak nei ila tiin, damloh ni khuaa buai tak leh thlaphanga kan awmloh nan tih te pawh  suangtuahin sum leh pai-ah te pawh kan innghat a, thlamuanna a awm dawn emaw kan ti thin. Mahse he khawvel thil hi zawngin thlamuanna tak tak min lo pe thei miah lo a lo ni.
        Chuvang chuan innghahna muanawm nei lote tan kan Lal Isua’n, “Thlamuanna ka hnutchhiah a che u, keima thlamuanna ka pe a che u” (Joh 14:27) min ti a, ‘khawvelin a pek ang che u in ka pek loh che u hi’  a la ti deuh deuh mai. Khawvel pawh hian engemaw ti kawng tak chuan muanna hi min lo pe ve thei tlat mai. Mahse, hruizen a mahni tung thluna awkin, kan fam leh mai thin. Chuvangin Isua Krista chauh hi innghahna muanawm, rinnaa kan tlukluhna tur chu a lo ni e. Isua Krista neitute chuan ‘khawvel hi bo mah se, Isua ka nei’ an lo ti thin a ni.
‘INGHAHNNA  MUANAWM  MIN  PETU
 PATHIAN  CHU  FAKIN  AWM  RAWH SE’